UKO WANYURWA N’UWO MWASHAKANYE

UKO WANYURWA N’UWO MWASHAKANYE

Mu bintu bibabaza abashakanye, ni ingeso yo gucana inyuma. Bamwe mu baganiriye n’ikinyamakuru Ishema mu mpamvu batanze zituma abantu baca inyuma abo bashakanye nabo, harimo kutanyurwa mu mibonano mpuzabitsina.

Ni yo mpamvu ikinyamakuru Ishema cyasanze muri iyi nomero cyageza kubakunzi bacyo ibyo umuntu yakora ngo age yumva aguwe neza mugihe kora imibonano hamwe n’uwo bashakanye atarinze kumuca inyuma ajya hirya no hino, dore ko bishobora kuzanira urugo ingorane zitandukanye. Twavuga indwara, kubyara hanze bikazateza ibibazo, guteba umutungo, n’izindi.

Umugabo witwa Habyarimana aganira n’ikinyamakuru Ishema  yabanje kutubwira impamvu zishobora gutera umuntu guca inyuma uwo bashakanye ko  ari nyinshi. Yagize ati: “ Umuntu ashobora guca inyuma uwo bashakanye kubera irari, umurengwe, ubukene, ariko impamvu iruta izindi ni ukutanyurwa n’uwo mwashakanye, n’ ibindi”. 

Imibonano mpuzabitsina ntinyura umuntu mu gihe k’igikorwa nyiri zina, bitangira kare mu biganiro, ari nayo mpamvu ngo abaca inyuma abo bashakanye bagubwa neza kurusha iyo bari iwabo. Yaragize ati : “Iyo umuntu ahana gahunda n’uwo batashakanye kuri telephone bimara igihe babiganiraho, bakabwirana ko bakumburanye, n’andi magambo meza, bakaza kubonana bafite imitima ikeye bateguranye.

Indi mpampu ituma abantu batashakanye banyurwa mu mibonano, ni uko baba badafite ibitekerezo bibavangira kuko  icyo gikorwa gisaba ko nta bitekerezo bikivangira umwe cyangwa bombi batekereza.

Indi mpamvu ituma abatarashakanye bagubwa neza mu mibonano bagirana, ituruka ku hantu bahurira. Iyo gahunda bayemeranyijweho, bahitamo ahantu hatuma uwo mubonano uba mu bwisanzure, utuma buri wese atagira imbogamizi kubera abatambuka iruhande rw’icyumba, nkuko bikunda kuba mu ngo.

Nkuko rero bigaragara ,kunyurwa mu mibonano bisaba gutegurana neza, kutarangarira mu bindi bitekerezo mugihe cy’icyo gikorwa. Gukora icyo gikorwa mu bwisanzure bituma habaho kunyurwa.

Buri wese naharanire gukosora ibitangenda neza kugirango hajye habaho kugubwa neza mugihe cy’imibonano y’abashakanye.

BUCYABUNGURUBWENGE Gaspard