INAMANZIZA: Icyo wakora igihe ubona uwo mwashakanye arimo ahinduka

Icyo wakora igihe ubona uwo mwashakanye arimo ahinduka

Ubundi umuntu ashakana n’undi ari uko abona imico ye ashobora kuyihanganira. Hari gihe rero umuntu agenda ahinduka, bitewe n’ibintu bitandukanye. Umugabo ashobora guhinduka bitewe n’ibibera mu rugo, bikamunanira kubyihanganira. Umugore nawe ni uko ibyo mu rugo bishobora gutuma ahorana ikirungurira agahora abumbye umunywa kandi yarajyaga yerekana amenyo yose. Ibindi bishobora gutuma umuntu ahinduka bishobora guturuka hanze y’urugo. Aho byaturuka hose hari uburyo bwo kubyitwaramo neza kandi bwagira umusaruro mwiza. Nta bundi buryo bwiza wabona kereka ubwo wakura mu mpapuro zerekana uko iyo mashine (urugo rwanyu) rwakorwa haramutse habayemo akabazo.

Hari ibintu bigurwa, bakabitangana na kataroge. Iyo iba ifasha kwereka umuntu imikorere y’icyo kintu, ariko iba izanafasha kumenya uko wayikora iramutse igize ikibazo.

Niyo yerekana aho bakanda bacana, bazimya n’ibindi.

Urugo rero narwo ni nk’imashini yakozwe n’Imana kuko ariyo yatumye mumenyana, mukemerana. Kataroge yayo rero ku bintu yaremye ni Bibiliya. Niyo mpamvu hagize icyo ushaka gukora cyangwa kugira ibyemezo ufata, ukwiye kwibaza ngo Bibiliya ibivuga ho iki?

Icyo wakora rero mu gihe uwo mwashakanye arimo ahinduka, wafata Bibiliya ukayirebamo, ukabanza ugashakamo ibyo usabwa kuri we, wasanga ubyujuje ubikora neza, ukarebamo uko wabigenza bitewe n’igihe murimo.

Nta ngero nirirwa ntanga, ariko niba hari ikibazo ufite hamagara nditaba kandi ndagufasha rwose.