Abagore bafasha abasheshakanguhe kurusha abagabo

Abagore bafasha abasheshakanguhe kurusha abagabo

Abanyarwanda bagira imvungo ko indinda ari ebyiri. Hari ndinda mubyeyi na ndinda mwana. Baba bashaka kuvuga ko umwana ukiri muto, akenera umubyeyi ngo amufashe gukura. Naho indinda ya kabiri ikaba iyo umubyeyi aba amaze kugira intege nke akaba akeneye ko umwana amusindagiza akamusazisha neza. Inzo nshingano kandi zinateganywa n’amategeko, ndetse n’abanyamadini bakazigisha nk’ihame riva ku Mana. Ku ndinda ya kabiri yo gufasha ababyeyi, abantu ngo ntibazikora mu buryo bungana, kuko ngo abagere bita ku babyeyi babo kurusha uko abagabo babikora, nkuko abo twaganiriye babivuga

Mutumwinka Damarisi atuye mu mujyi wa Kigali, akagira ababyi mu majyepfo. Avuga ko avukana n’abahungu bane kandi bose bifashije. Nyamara ngo ntibamufasha cyane kwita ku babyeyi babo bageze mu zabukuru. Ngo barabasiganira, ndetse rimwe narimwe ababyeyi bakagira ikibazo cyo kubura amafaranga kuko umwe ngo aba yumva undi yaragize icyo abaha. Avuga ko niyo ahamagaye basaza be, bose bamurerega bakamubwira ngo nanyaruke abarebe ababwire uko bimeze. Yagize ati: Jye mbona abagabo bamwe bavunisha bashiki babo ku mibereho y’ubasaza n’abakecuru, kandi twese twarabavunnye kimwe. Nabanje kujya ngira ngo ni abagore babitera, ariko naje  gusanga ari ikibazo cya kamere kuri bamwe. Muri make nasanze abagabo benshi batita ku bageze mu zabukuru nk’abagore”. Asoza asaba abagabo ko nabo bajya bagira akayihayiho k’abageze mu zabukuru, bakita ku kecuru n’abasaza kuko baba barabavunnye mu buto. Avuga ko abize baba barabatangiriye amafaranga ndetse barabaga bigomwe ibitari bike. Ngo bakwiye kwibuka uko bagiye babitaho no mugihe cy’uburwayi, bakibuka ukuntu ba nyina bagiye babina, ukuntu baryanga ubusa ngo bige n’ibindi.

Birikunzira avuga ko ibivugwa ko abagabo ko batita ku byeyi babo nk’abagore, biterwa n’uko imirimo yabo itagaragara cyane. Ngo bo bakunda gutanga amafaranga, indi mirimo ikaba ibagora cyane kuyikora. Yagize ati: “ Abagabo, dufasha mu buryo bw’amafaranga kurusha abagore n’ubwo ari bo bashimwa. Bo iyo basuye ababyeyi, barabamesera, bakatekera, bigatuma ibikorwa byabo bigaragara cyane, kurusha ibyacu. Ariko rero natwe tuba twagerageje, n’ubwo hari igihe baba bafite ibibazo kandi natwe dufite ubukene.” Akomeza avuga ko abagore bashobora no gukora byinshi koko, bitewe n’impamvu zitandukanye. Harimo kuba imicungire y’amafaranga yabo, akenshi itamera kimwe n’iy’abagabo. Ngo ku mushahara w’umugabo, haba hagomba kuvamo ibintu byinshi bituma agenda agira ikibazo cyo kubona ayo gufasha ababikeneye.

Nyirandegeya Nawomi umukecuru wo muri Kamonyi ufite abana baba mu mugi wa Kigali, ahamya ko abana be bamuzirikana, bamufasha mu zabukuru, ariko  agahamya ko abakobwa barusha abahungu kumugeraho kenshi. Yagize ati: “ Mfite abana bane i Kigali, abahungu babiri n’abakobwa babiri. Bose barubatse. Baragerageza si nabakamira mu kitoze rwose. Ariko abakobwa bangeraho kenshi kurusha abahungu. Yewe n’abuzukuru banjye mbona abavuka ku bakobwa barusha abo kubahungu banjye kunsura. Hari n’ubwo mbona abakwe banjye barusha abahungu banjye kunyitaho.” Akomeza agira abagabo inama yo kujya bita kubasheshe akanguhe kimwe n’abashiki babo, ngo kuko baba baravunnye ababyeyi kimwe. Agira ati: “ Ubundi turera tutarabanura, yewe hambere n’abahungu nibo bahabwaga iminani bashiki babo bakaviramo aho, ariko wajya kureba ugaruka ngo yite ku babyeyi, ugasanga umukobwa arava ikantarange akarusha basaza be ibikorwa bifatika kandi ataramurushije kwitabwaho.”

Mukamunana nawe asanga abagabo batita ku babyeyi kimwe n’abagare, akavuga ko biterwa n’ingeso abagabo benshi bagira yo kwikunda, bakihugiraho bagatererana ababyeyi. Asanga ababigira bakwiye kubicikaho, kuko ngo binababaza abagore kandi bikanabateranya. Yagize ati : “ Iyo umugabo atita ku bo mu muryango we cyane cyane ababyeyi, abenshi bishyiramo ko biba biterwa n’abakazana babo nyamata atari byo.” Asoza asaba abagabo nabo kujya bita ku bo mu miryango yabo cyane cyane ababyeyi.