Ibyakorwa ngo he kubaho amakimbirane y'abaramukazi

Ibyakorwa ngo he kubaho amakimbirane y'abaramukazi

Bisa n’ibintu bimenyerewe kuri bamwe, ko habaho kutumvikana kw’abaramukazi . Ni ukuvuga umugore n’abashiki b’umugabo we. Baba bakiri abakobwa cyangwa se barashetse, abenshi bakunda kugirana amakimbirane. Abo twaganiriye kuri iyo ngingo, bavuga impamvu zibitera, bakanagira inama batanga ngo abantu bari bakwiye kugirana ubucuti be kubaho bashyamiranye, dore ko hari n’aho biba ibintu bikomeye bikanagera ubwo abana babo nabo babaho mu makimbirane.

Uwitwa Ntwari avuga ko ikibitera kinini ari uko umusore aba asanzwe agira ibyo afashamo bashiki be yashaka bigashira cyangwa bikagabanuka noneho ntibabyishimire, bakabona ko muramukazi wabo yaje kubabera kidobya. Agira ati: “ Iyo umusore afite uburere, akagira icyo ageraho, yumva afite inshingano zo gufasha ababyeyi, barumuna be ndetse na bashiki be. Iyo amaze gushaka, kuri abo bose ibintu bisa n’ibihindutse kuko aba afite inshingano zo kwita k’umugore we, no gushaka uburyo agira urugo rukomeye. Aba yitegura ibizatunga abana. Ku bantu rero batagira imitekerereze iciye mu kuri, bumva ko yabaretse, ko muramukazi wabo yatumye abanga, bagatangira kumwishyiramo, no kugirana ibibazo nawe”. Akomeza avuga ko ab’umuryango w’umugabo bari bakwiye kujya bumva ko tuba twarakoze uko dushoboye tutarashaka, no neho bakaduha umwanya wo kwita ku bagore bacu n’abazadukomokaho.

Ishimwe Agnes avuga ko impamvu itera amakimbirane ku bagore bamwe n’abaramukazi babo ari agasuzuzuguro abakobwa bagirira abagore ba basaza babo. Baba bashaka kubategeka, ndetse hakaba n’abatinyuka bakabatuka. Yagize ati “ Rwose hari abakobwa cyangwa abagore bahangara bagatuka baramukazi babo. Ukumva arihanukiriye ngo uraramye mu mari ya musaza wanjye. Ngo ntiwaje uzanye ivarizi y’imyenda gusa? Nyamara baba birengagije ko hari ibyo aba yakoze nawe ngo bagire icyo batunga.” Icyakora avuga ko hari abashyira mu gaciro, bakumvikana na baramukazi babo, ngo kuburyo bashobora kuhaba biga, cyangwa bakora. Akongeraho ariko ho hari n’abagore batoroshye baba bashaka ko umugabo atagira na gito afashamo bene nyina. Agatanga inama ko bene abo babireka, ahubwo bakajya babafasha uko bashoboye.

Muvunyi Donata we yongeraho ko  hari igihe baramukazi b’umugore baba batamwiyumvamo kubera ibintu bitandukanye. Agira ati “ Burya hari abantu bagira ibyo bibwira mu mitima kandi bikagaraga inyuma, bimwe bikaba binabyara agasuzuguro ku bakobwa cyangwa abagore bagaragariza baramukazi babo. Impamvu zishobora kuba nyinshi. Hari abafatira k’ubwoko. Hari abasuzugurira umugore wa musaza wabo  ubutunzi bw’aho avuka cyane cyane iyo umugore avuka mu rugo rudafite ubutunzi nk’ubw’umuryango w’umugabo we. Kandi ibyo nibyo bikunda kugaragara. Ikindi hari ababiterwa n’amashuri. Ugasanga niba bo baragize umugisha bakiga amashuri runaka, muramukazi wabo yaba atayafite bakajya bamusuzugura. Mbese, impamvu zaba nyinshi nk’ isura, imyizerere n’ibindi. Gusa ntibyari bikwiye. Ahubwo nkuko mu ndimi z’amahanga babivuga cyane cyane mu cyongerezeza aho bavuga  ngo “Sister in law” ngenekereje mu Kinyarwanda navunga ngo umuvandimwe kubera amategeko, bari bakwiye kubana neza, bagashyigikirana, bakajya inama, bikanatuma abana babo bazakura bakundana, batishishanya.”