Uko umuntu yabigenza igihe arwaye imiswa yo mubirenge

Uko umuntu yabigenza igihe arwaye imiswa yo mubirenge

Hari ibice by’umubiri bikunze kutarwara cyane, uretse habaye nk’impanuka umuntu agakomereka. Ibyo ni nko mukirenge hasi no mu kiganza. Nubwo ariko bidakunda kurwara, hari igihe biba, kandi bikaba ikibazo kuko ibirenge bifasha umuntu kugenda, yewe n’iyo atagenda n’amaguru ahantu harehare kubera gukoresha imodoka cyangwa moto, nibyo bikoreshwa mu gutwara, kandi bikaza kuba ngombwa ko agira igihe agendesha amaguru. Ibyo bigatuma iyo afite ikibazo mu kirenge bimugora. Mu ndwara zishobora kugaragara mu birenge, harimo iyitwa imiswa. Abigeze kuyirwara twaraganiriye bavuga icyayiteye n’uko babigenje, kandi muganga Nkurikiyinka Valens nawe yatangarije Imvaho Nshya iby’iyo ndwara, impamvu zishobora kuyitera n’icyakorwa mu gihe umuntu ayirwaye.

Simbi avuga ko yigeze kugira ikibazo cy’imiswa muri aya magambo. “ Mu myaka nk’ibiri itambutse nagize ikibazo cyo kurwara mu birenge. Bibanza kunyobera kuko bitari imyate, nza kumenya ko ari imiswa. Ni indwara ijya kumera nko ku mungwa kw’umubiri. Nayirwaye mu birenge hasi, ahajya kuba munsi y’agatsinsino. Nayitewe na bodaboda, ubwoko bw’inkweto nari maze kwambara nk’ibyumweru bibiri. Nahise nzireka, ndushaho kugirira isuku ibirenge irakira. Sinigenze njya kwa muganga kubera ko nafatiranye”.

Ndibwami Simoni avuga ko yarwaye imiswa mu birenge  bikageza ubwo imubuza kujya agenda, kuko yari yaratumye mu birenge hahora hokera nk’abahiye, ariko ntihajemo ibisebe nk’iby’ubushye. Noneho yakandagira akababara cyane. Yaje kujya kwa muganga bamuha imiti.

Muganga Nkurikiyinka Valens avuga ko imiswa yo mu birenge ikunda kuza ahantu umuntu akandagirira, Aho iri umuntu yumva hasa nahabyimbye, ariko ati ibibyimba. Iyo nta gikozwe mu maguru mashya ikura yinjira mu mubiri, maze umuntu akumva hajemo uburemere. Umuntu ashobora kugira ibyo akora mu gihe arwaye imiswa yo kubirenge nko gushyira agapfuko kabugenewe aho iri. Yagize ati. “Ukata agapfuko kangana n’uko umuswa ungana, ukagafatisha ukoresheje siparadara. Ukagajya uhindura kugeza igihe ukiriye”.

Avuga ko ibyiza ari uko ufite ikibazo cy’imiswa yajya kwa  muganga, kuko hari ubwoko bw’imiti bukoreshwa bitewe n’uko imiswa imeze, n’impamvu yabiteye.

Asoza avuga ko kugirango umuntu atazongera kurwara imiswa ari byiza guhindura amasogisi bikaba byiza kurushaho no guhindura inkweto ukambara inkweto izabiteye cyangwa izambawe uyirwaye ukazireka.