JYA WUBAHIRIZA AMABWIRIZA YA MUGANGA NI BYIZA CYANE

KUBAHIRIZA AMABWIRIZA YA MUGANGA NI BYIZA CYANE 

Umuntu wese uko yaba ameze kose nta agera igihe akarwara. Ntawarahira ko atazagera igihe agira ibibazo by’umubiri ngo arware. Icyakora bitewe nuko umuntu abaho, uko arya n’uko anyway ashobora kugira ubudahangwarwa butuma atarwaragurika kuko aba afite ibirinda indwara mu mubiri we. Ariko akagera igihe akagira ubwo arwara. Iyo umuntu arwaye, akajya kwa muganga adatinze bimugirira akamaro cyane. Baramusuzuma bakamuha imiti. Yaba kwa muganga cyangwa aho afatira imiti bamugira inama y’uko akwiye kubyitwaramo. Nkuko abantu batari bake babimbwiye, ibyo uko ari bibiri bigira akamaro.

Habintwari Augustin umurwayi wa diyabete yambwiye ko ikimufasha gukomeza kugira ubuzima n’ubwo arwaye indwara ikomeye ari uko yubahirije amabwiriza ya muganga. Yagize ati: “Diyabete ni indwara mbi itagira umuti, ariko nyimaranye igihe kinini cyane, hafi imyaka 25, kubera kubahiriza amabwiriza ya muganga. Ibyo bambujije kurya narabiretse, ibyo bambujije kunywa narabiretse. Ibyo bituma nkomeza kugira imbaraga, kandi diambete ntibashe kunzahaza”.Yakomeje abwira Imvaho Nshya ko hari antu azi, bamenyeye rimwe ko barwaye Diyabete ariko batubahirije amabwiriza ya muganga bikabaviramo ingorane cyane ubu bakaba ari indembe kandi biranashoboka ko hashobora no kuba hari abarwaye diyabete nyuma ye ariko kubera kudakurikiza amabwiriza ya muganga bakaba barapfuye. Yagize ati: “Burya gukurikiza amabwiriza ya muganga bigira akamaro cyane. Imiti muganga atanga siyo igira akamaro gusa, ahubwo iyo uyifata yubahirije amabwiriza ye nibwo akira cyangwa akaba n’indwara igihe kirerekire cyane iyo ari indwara idakira.”

Muteteri ubana n’ubwandu bw’agakoko gatera SIDA yabwiye Imvaho Nshya ko gukurikiza inama ya muganga byatumye amarana ubwandu igihe kinini kandi akaba agikomeje akazi ke kuburyo n’uwo atabibwiye nta wa menya ko abana nabwo. Yagize ati: “Kubahiriza amabwiriza ya muganga nsanga aribyo bintu biruta ibindi mu buzima bwa muntu. Kumenya ko mbana n’ubwandu ni uko numviye amabwiriza ya muganga njya kwisuzumisha. Nta kintu na kimwe cyari kumbwira ko mbana n’ubwandu, kandi nta n’undi wari kubimenya, ariko ubukangurambaga bwatumye njya kwipimisha. Nasanze naranduye, birambabaza cyane, ariko mfata gahunda yo gukurikiza amabwiriza ya muganga, ngakoresha ibizami buri gihe ngo ndebe abasirikare mfite. Inama zo kwa muganga zatumye mbasha kumarana ubwandu imyaka hafi makumyabiri, nta wabimenya, kandi ubu nkomeje gukora imirimo yanjye mfite imbaraga. Byatumye nta byuririzi ndwara. Jye mbona umuntu yaba arwara indwara yo roshye cyangwa ikomeye, icyamubera cyiza ari uko yakurikiza amabwiriza ya muganga.” Yakomeje avuga ko hari abantu badakurikiza amabwiriza ya muganga, bagafata nabi ibinini bahabwa, abandi bakabifata mu buryo budakurikiza amabwiriza bakarenga ku mabwiriza y’ibyo batagomba kunywa nk’inzoga, ntibafate imbuto cyangwa ngo bakore siporo, byarangiza bikakururira kurwara ibyuririzi.  Ahamya ko buri muntu yajya yubahiriza amabwiriza ya muganga kugirango abashe kugira ubuzima bwiza.

Ndaberetse w’iburasirazuba nawe yabwiye Imvaho Nshya ko uwakurikiza inama za muganga yarushaho kugira ubuzima bwiza. Yagize ati:” Gukurikiza inama za muganga byatuma umuntu agira ubuzima bwiza cyane. Mfashe urugero rwo kwirinda kurwara, kwa muganga batugira inama yo gukoresha neza inzitiramibu nyamara ugasanga hari abaryama batazirayemo,bigatuma imibu ikabatera marariya, bagahomberwa n’ibintu byinshi kandi bivuye ku kudakuriza amabwiraiza ya muganga. Ikindi abaganga bakunda kugira inama abantu benshi ntibabihe agaciro, ni ukudafunguza amenyo za fanta cyangwa za byeri. Abaganga babuza abantu gufunguza amenyo kubera ko biyangiza  bikayacukura. Nyamara hari abantu nubu bagifunguza amenyo fanta, Ibyo bituma harimo abagira ibibazo by’amanyo nko guhongoka, gucukurika, kubera kudakurikiza amabwiriza ya muganga.” Avuga ko ibyiza ari uko buri wese yakurikiza inama ya muganga kuko aribyo bishobora gutuma agira ubuzima bwiza.

Ndatimana wo muri Kicukiro, yabwiye Imvaho Nshya ko yigeze kugira ingorane kubera kudakurikiza inama ya muganga. Yagize ati: “Nagize ingorane umunsi umwe mbitewe no kudakuriza inama za muganga. Nagiye kwa muganga ndwaye giripe, bampa imiti, ndanginje nywa mwinshi kurusha uko bari banyandikiye,kuko nifuza gukira vuba. Naguwe nabi cyane kugeza ubwo mpamagaye muganga mubaza icyo nakora, angira inama z’umuti njya kugura maze kuwunywa nibwo numvise nongeye kugira ubuzima mbasha gutekereza neza, Uramva ko nari nzize ubujiji bwo kudakurikiza inama za muganga, ariko nanone nkizwa no gukurikiza inama za muganga. Buriya rero gukurikiza amabwiriza y’aganga nibyo bishobora gutuma tugira ubuzima buzira umuze.”