Ibyatuma abubakanye bahorana ibyishimo n’umunezero

Ibyatuma abubakanye bahorana ibyishimo n’umunezero

Umuntu wese yubaka urugo, ashaka ko ruzaba urugo rumunezeza, agatunga agatunganirwa, akabana neza n’uwo bashakanye. Muri iyi minsi hari ibibazo mu miryango itari mike, aho usanga abashakanye babanye nabi, nta munezero, abashakanye bakabana ari ukumumiriza kuko nta kundi babigira. Abo twaganiriye hari ibyo bavuga ko abashakanye  babikoze bagira umunezero mu rugo.

Nyiramana w’i Gikondo atanga inama zatuma abashakanye bagira ibyishimo n’umunezero mu rugo agira ati:” Abashakanye buri wese aba ashaka  kwitabwaho no kugaragarizwa urukundo kandi akenshi bitangira ari byiza, bikagenda bihinduka uko bamarana igihe, ndetse akenshi bitewe n’impamvu zitanakomeye. Nkurikije uko mbibona hari ibyo abashakanye bakora bagakomeza kugira umunezero mu rugo.  Icyambere mbona ari uko buri wese yazirikana ibyo yasezeranije mugenzi we.  Abamaze kwemeranywa kubana bagirana ibiganiro biba birimo amasezerano y’uko bazabana. Kuyibuka no kuyakurikiza byabafasha kugira umunezero n’ibyishimo mu rugo rwabo.

Icya kabiri ni ukugira umuco wo gutanga kurusha guhabwa. Kutifuza guhabwa gusa, kuko bishobora kugaraga nko kwikunda bigatera undi guhora avunika ngo agire icyo aguha, akazageza ubwo yumva umubera umutwaro. Kubera ko ineza y’umuntu ariyo imutera gukundwa, buri wese akwiye kugira ibyo aha mugenzi, bitabaye itegeko ahubwo mu rukundo, kuri iyi ngingo, umuntu agomba gutanga igihe cye k’uwo bashakanye, ubutunzi bwo buba ari ubwanyu mwese bitewe n’uko mwagiranye amasezerano. Ariko cyane cyane ku muha umutima ntugire ibyo umukinga kuko iyo abimenye ababara cyane.

Mu mibanire kandi, buri wese akwiye kugira uruhare mu kwishakira umunezero. Buri wese akwiye kumenya ko ntawundi ushinzwe ibyishimo bye kumurusha. Ntawe ukwiye kumva ko mugenzi we ariwe ugomba kumushakira ibyishimo. Ahubwo buri wese akwiye gukora k’uburyo nahura na mugenzi we amusangana ibyishimo. Iyo bahuye  buri wese yifitemo ibyishimo, bahuza urugwiro mu kanyamuneza, amahoro agasagamba. Icyakora igihe hari ibyababaje umuntu, mugenzi we akwiye kumufasha kongera kwishima, ariko nyiri ubwite niwe ufite uruhare rukomeye.

Kugirira icyizere uwo mwashakanye bituma nawe akikugirira, kuko akebo ngo kajya iwa mugarura. Kandi azirinda ko wamubona uko utamukekaga bitume yitwararika maze bibazanire amahoro n’ibyishimo.

Gushyira mu gaciro ntihagire uba nta munoza. Burya ababana bakwiye gutinda ku byiza cyane aho gutinda ku bitagenda, ngo usange buri gihe ari ukujora ibitakozwe neza. Umuntu wese akwiye gukundira mugenzi we ibyiza bye amwihanganira mu byo adashobora, yibuka ko nawe hari ibyo ananirwa n’ibyo ashobora. Nkuko abanyarwanda babivuze kandi,ntazibana zidakomanya amahembe. Hari igihe ababana bagira ibyo batumvikana ho, ariko si byiza ko mugenzi wawe agukoshereje umugirira inzika. Kugira inzika bizana amakimbirane, ari nabyo bibyara incyuro. Ahubwo ikintu gitera umunezero nyuma y’amakosa ni ukubabarira. Burya kubabarira ni ngombwa. Umuntu wese yari akwiye guhora yiteguye kubabarira abantu cyane cyane mugenzi we. Ni ikimenyetso ku  bakundana kikaba igikorwa cy’ushaka kugira umunezero.

Ugirashebuja Desideri yongereho ibindi bintu bishobora gufasha abashakanye guhora banezerewe, agira ati  « Kumenya guhanga udushya mu kuzamura urugo nabyo bituma batabona umwanya w’abazanira ibibazo. Iyo buri wese akora uko ashoboye ngo ahange agashya usanga urugo ruhoramo umunezero. Uko guhanga udushya nitwo tubazamura kandi burya ahari ukuzamuka k’umutungo n’imibereho, niho haba kuzamuka kw’amahoro n’umunezero. Mbese bijya kumera nk’ibya wa mugani ngo nta gukunda inzara itema amara ».

Akomeza avuga ko gushimira icyiza cyose bizamutera mugenzi wawe imbaraga. Azabona ko atavunikira ubusa, ko imvune ye uyibona maze bitume arushaho kugira umuhati. Asireza ku kintu avuga ko gikomeye agira ati : « Igihatse ibyo byose ariko ni ukugira igihe cyo kuba hamwe  kuko nubwo waba ukundana n’umuntu mutagira igihe muhura ni nko guteka nta birungo. Nubwo mwaba mufite imbogamizi kubera akazi, amasomo, imirio n’ibindi, ni byiza ko mu mpera z’icyumweru mugira igihe cyo kuba hamwe. Mu gihe kandi icyo gihe kitakunda ko mwicara ngo mutere igiparu, mubwirane inkuru zishekeje, buri wese akwiye kwereka undi ko amuzirikana. Akamahamagara, akamusuhuza, akamabuza amakuru kandi akamumenyesha uko amarewe, mu buryo bw’umubiri, mu maranga mutima n’ibindi. » Ngibyo bimwe bu byatuma urugo ruhoramo umunezero, igisigaye buri wese akaba yareba icyo yongera kubyo yakoraga.