Jya ukoresha telephone kuburyo itabangamira uwo mwashakanye

Jya ukoresha telephone kuburyo itabangamira uwo mwashakanye

Abantu batandukanye twaganiriye bavuze  ko abagore ari abantu bagira kwihangana ku bibazo bibera mu ngo kurusha abagabo. Muri iyi minsi ibyo bihanganira bikomeye ni kumenya ko umugabo afite indi nshuti y’umugore cyangwa umukobwa. Aho bakunda kumenyera ko umugabo afite inshuti ni uburyo akoresha telephone kandi abenshi mu mu twaganiriye bemeza ko imikoreshereze ya telephone ku bagabo bamwe, bibangamira abagore batari bake. Batanga inama zatuma abagore batabangimirwa n’imikoreshereze ya telefone z’abagabo babo, ariko bakagira inama n’abagabo ko bakoresha telefone zabo, ntibangamire abagore babo.

 Nkuko umugore witwa Murekeyisoni w’i Muhanga. Yagize ati: “ Hari abagabo bamwe bakoresha telefone mu buryo bubangamira abagore. Iyo umugabo agiye kwitaba telefone yari kumwe n’umugore we mu cyumba cyangwa ku meza, akajya ahitaruye; akajya avuga gahora kandi yimwenyuza, bibabaza umugore ndetse agatangira kwibaza ibibazo bitari bike, atekereza ko umugabo we afite inshuti hanze atazi kandi bapanga ibintu badashaka ko amenya”

Yakomeje avuga ko hari abitwiza ko nta rezo iri mu cyumba cyangwa mu nzu, nyamara ngo sibyo kuko hari ibihe abakora ibyo bashobora kuvugana n’abandi kandi bakumvikana. Ahubwo ngo basohoka abashaka kugira ibyo bahisha umugore. Avuga ko ubusanzwe umugabo n’umugore baba bagomba kuganira byose, mbese ko nta mabanga umugabo yangombye kugira umugore atazi.Nta nshuti yagombye kugira umugore atazi. Yagize ati:”Abagabo bamwe batekereza ko abagore babo ari abantu badatekereza. Bakabwira ngo ni iby’akazi yavugana n’uwo bakorana. Bakibagirwa ko nubwo umugore yaba adakorana n’umugabo, yewe akaba ataranahakandagira, adashobora kuyoberwa abavugana iby’akazi n’iby’ub ucuti busanzwe.

Muhawenimana Venantie utuye muri Kicukiro we avuga ko telefone muri iyi minsi ari igikoresho kibangamira abagore kuko uburyo ikoreshwa n’abagabo bamwe bitera agahinda abagore. Yagize ati:”Muri iyi minsi telefone zabaye abakeba. Ubu abagabo bamwe nta mwanya wo kuganira n’abaoge babo ukiboneka  kubera telefone. Usanga umugabo ahugiye kuri Watsapu, ngo arahana amakuru n’abagenzi be. Ikibabaza abagore bamwe  ni uko ayo makuru bayagira ibanga kandi ikintu kiswe inkuru kiba kigomba kubwirwa abantu benshi bashoboka. Birashoboka ko amabanga aba bafite ari  gahunda n’abacuti babo, baba abo basangira inzonga cyangwa abo bacuditse mu bundi buryo”. Yakomeje avuga ko abanshi banakomereza mu cyumba ngo barashaka kuryama bamenye amakuru araye. Ibyo ngo babikora bibagiwe ko umuntu aba akeneye kuryama no kuruhuka kandi hari n’igihe aba akeneye kugira ibyo baganira. Iyo rero  ahisemo kuganira na telefone ni ukuvuga ko iba ibaye nka mukeba w’umugore.

Muhawenimana kandi yagize inama atanga ku bagabo n’abagore. Yagize ati:”Umugabo wese uzasoma inyandiko y’Imvaho Nshya, agasanga uburyo akoresha telefone byabangamiraga umugore we, azagerageze ahindure kandi agire n’abagenzi inama. Abagore natwe twishyire mu mutuzo, ufite icyo kibazo akihanganire, kuko gusakuza si umuti, kandi guhora umuntu ahanganye n’umugabo ntibyubaka urugo ahubwo birarwangiza”. Asoza atanga inama ku bagore cyangwa abakobwa batwara abagabo babandi babarya umutima babandikira za mesaje zibararura ko babireka kuko inabi igira iherezo ribi. Yagize ati: “ Umuntu akora ineza akayisanga imbere, kandi n’inabi nayo igira ingaruka k’umuntu. Ikindi niba umuntu atakwishimira ko icyintu kimubaho cyangwa kuri mwene nyina kugikorera undi ni ibintu bidakwiye. Yego hari abagabo baba babeshye ko nta bagore bagira, ariko se igihe umuntu abimenye kuki akomeza, ahubwo akarakarira umugore nkaho ariwe umuhemukira. Ntibyari bikwiye.”