Umubyeyi utembereza umwana aba amutegura kuba umuvumbuzi

Umubyeyi utembereza umwana aba amutegura kuba umuvumbuzi

Mu nshingano z’umubyeyi harimo ibintu byinshi asabwa gukorera umwana cyangwa abana be. Hari ukubitaho mu birebana n’ubuzima, kubakingiza no kubavuza igihe barwaye, kubagaburira, kubambika n’ibindi. Hari ibindi umwana akenera kandi bimugirira akamaro mu buzima bwe. Muri ibyo harimo no kumutembereza. Abo twavuganye  kuri iyo ngingo bose bavuze ko ari ngombwa kandi ko bidahenze, bikaba bigirira akamaro gakomeye umwana, harimo kuruhuka ndetse no gutuma ashobora kuba umuvumbuzi cyangwa umushakashatsi.

Mukamurenzi Alice avuga ko gutembereza umwana ari byiza, bidahenze bituma aruhuka kandi akaba ashobora gukura mu bitekerezo. Yagize ati: “Iyo umuntu mukuru ananiwe, aratembera, akacira ahantu akareba ibidukikije maze akaruhuka. Iyo agiye ahantu uko haba hangana kose bimusaba amafaranga y’itike. Iyo aza kugira icyo afata agomba guteganya amafaranga yo kukigura. Gutembereza umwana byo ntibihenze kuko haba mu modoka ntibamurihisha, ikindi kandi ntafata ibintu bigura menshi kuko afata ibintu bike cyane Nyamara gutemberana n’umwana bigira akamaro kanini kuko nawe aruhuka. Burya umwana nawe arakora kandi arananirwa. Iyo umubyeyi amutembereje rero, nawe araruhuka. Akabona ibintu bishya. Uko abyitegereza, bimufungura mu bitekerezo kuburyo ashobora gukura agira ibitekerezo byazanatuma ashobora kuvamo umushakashati w’umuvumbuzi. Yakomeje avuga ko kera se yajyaga abatembereza, akabagurira ibintu byo kurya ngo kunywa, ariko icyamushimishaga cyane ari ibyo yahumviraga cyangwa yabonaga. Ngo kumva ababaga barize baganira mu ndimi z’amahanga, byatumye akura akunda indimi none ubu akaba ari nazo yize kandi bikaba bimufitiye akamaro cyane kuko abikuramo amafaranga mu buryo butandukanye. Arangiza ashishikariza ababyeyi kujya batemberana abana, kuko bifite akamaro cyane kandi bidahenze.

Hategekimana Daniel avuga ko gutembereza umwana ari kimwe mu byatuma umwana ashobora kuba umuhanga mu ishuri.. Yagize ati: Navukiye muri uyu mujyi wa Kigali, data yari umusirimu kandi yaradutemberezaga, yewe yajyaga anatujyana kwa sogukuru mu majyepfo na barumuna banjye, ibyo byaradushimishaga, kandi byatumaga tugira ibintu byinshi twunguka. Tuvuge nk’ibyo mu giturage bikorwa bikorwa n’abana nko guteka nyirankono, gusimbuka urukiramende, gutera uruziga n’ibindi. Ariko twanamenyaga ibintu bindi kandi byadufashaga mu ishuri. Ndibuka ko kumenya ibihingwa n’amazina yabyo, byatuma iyo twigaga iby’ibingwa ngandura rugo cyangwa ngengabukungu tubyumva cyane. Ndetse iyo twageraga aho ubu bita Rwandex, kuko burya habaga uruganda rwatonoraga ikawa mbere y’uko bayohereza mu mahanga, twabashaga kumenya ibitari bike, kuko twabaga twarabonye ikawa z’ingemwe, izera, n’ibindi. Ibyo rero hari icyo byadufashaga cyane kuko twabaga twarafungutse mu bitekerezo. Ikindi nibuka ni uko isomo ry’ubumenyi bw’isi naritsindaga cyane kuko nabanga nzi ibiyaga, inzuzi n’ibindi kubera ko yajyaga atujyana kuri Muhazi, ndetse rimwe narimwe tukajya no muri parike”. Avuga igikorwa cyo gutembereza abana ari cyiza kandi ko iyo bikozwe n’abagore aribwo bigira umusaruro cyane ngo kuko ababyeyi b’abagore bashobora kwihanganira ibibazo kandi bakabisubiza batinuba bityo bigatuma abana basobanukirwa neza. Yagize ati:” Nanone ariko uko badutemberezaga,  twakunda kubaza ibibazo mama nkuko buri mwana wese abaza. Imapmvu ariwe twakundaga kubaza utubazo twinshi, nuko ariwe wadusubizaga neza, akadusobanurira buri kantu tumubajije atatwinuba, naho papa we yadusubizaga nka bibiri ibindi akatubwira ko tumutesha umutwe”. Yashoje asaba abagore ko nubwo bagira imirimo myinshi kandi, bakwiye no kugerageza kubonera  abana umwanya wo kubatembereza, kuko bidahenze kandi bikaba byashobora kubagira akamaro cyane. Byatuma baruhuka, baba abashakashatsi mu buryo bukomeye.