Icyo baba bavuga bita umugore Mutima w’urugo

Icyo baba bavuga bita umugore Mutima w’urugo

Hari imvugo zimaze igihe kinini zikoreshwa, kuburyo udashobora kumenya inkomoko n’igihe nyacyo zatangiriye. Muri izo hari ivuga ngo umugore ni umutima w’urugo. Kubera iki bamugereranya n’umutima. Ntibamugereranya n’izindi ngingo ngo kubera ko hari izibura umubiri ugakomeza kubaho, ariko bakamugereranya n’umutima ngo kubera ko ariurugingo ruba imbere mu gituza cy’umuntu, ukaba ufite akamaro kanini kuko ariwo wohereza amaraso mu myanya yose y’umubiri, kandi ukongera ugatunganya ayakoreshejwe kugirango yongere akoreshwe amaze kuba meza. Ngo n’umugore niko amera, atuma ab’umuryango bashobora kubaho abakorera byose, akongera akabakira bavuye ahantu hatandukanye ibyo bamusanganye bikabagarurira imbaraga n’ubuzima. Si bo gusa kandi kuko n’abagenda mu rugo ibibakorerwa byose, umugore abigiramo uruhare runini cyane bigatuma rero afatwa nk’inyama y’umutima mu muntu, nkuko abo twaganiriye babihamya.

Dusabe Marita ni umugore ukuze  asobanura impamvu bavuga ko umugore ari umutima w’urugo muri aya magambo. “ Burya imirimo y’umugore akenshi niyo iha ubuzima abarubamo bose. Ni we umenya ibintu byinshi byo mu rugo, byaba ibiribwa, imyambaro y’umugabo n’iy’abana. Iyo bakorana n’iyo barimbana. Abwirwa byinshi n’ababa mu rugo, byaba ibyo ku mashuri aho bana biga cyangwa ibyo kukazi k’umugabo. Asabwa byose n’umukozi k’umufite. Mbese niwe zingiro ry’ibibera mu rugo aho biva bikagera. Niyo umugore atirirwa mu rugo akora akazi ka leta , akorera abandi cyangwa se yikorera, abigerekaho kuba moteri y’ibikorwa byo murugo.  Ngiyo imbomvu bavuga ko  umugore ari umutima w’urugo”. Yakomeje avuga ko ari nayo mpamvu akenshi umugore apfa ,nyuma y’igihe runaka umugabo agashaka undi, ariko umugore yapfakara akaba ashobora kwigumiraho akirerera abana kugeza ashaje.

Mutima w'urugo Ishimwe Sangwa Everyne n'umukobwa aheruka kwibaruka

 
Nkurunziza Fabien  ahamya ko uwahimbye iyi mvugo ashobora kuba yari umuhanga mu bumenyamuntu akaba n’umuhanga mu by’ingo muri aya magambo. “ Nkurikije ukuntu umutima ufite akamaro kanini mu mubuzima bw’umuntu n’uburyo umugore nawe afite akamaro katagereranywa mu mu muryango, umugore nta kindi wamugereranya nacyo mu muburi w’umuntu. Reba nawe uburyo atanga ubuzima. Aratwika, akabyara,akarera, mu gihe bavuga ko umugabo ari nk’imfizi ibyara ntivumere.  Ntawakwirengagiza uruhare rwe mu gucunga neza no kubyaza umusaruro w’urugo , uburyo aryoha umugabo, akamutegurira ibyo kurya, kwambara n’ibindi, kugira umugabo inama zituma ashobora gutunganya ibyo ashinzwe nubwo yaba amurusha amashuri gute. Burya abagore benshi bagira uruhare runini mu guha umurongo abo murugo yewe n’umugabo kandi baba barahuye akuze, ndetse akaba nta bubasha bwo kumucyaha agira. Ariko mu bushobozi bwe bujyana no gucisha make, nawe amushyira ku murongo akamushobora. Niwe utera urugo kugendwa. Burya umugore udafite umuco wo gukunda no gufata neza abashyitsi agira urugo rutagendwa. Ni nka cyagihe umutima udasohora cyangwa ngo wakire amaraso neza. Bituma umubiri ugira ibibazo. Umugore rero ni umutima w’urugo kubera ibyo byose ashinzwe”.